Berkarar döwletiň täze eýýamynyň Galkynyşy döwründe Gahryman Arkadagymyzyň il-ýurt, umumadamzat bähbitli ynsanperwer ýoluny üstünlikli dowam edýän Arkadagly Gahryman Serdarymyzyň parasatly baştutanlygynda, halkara hyzmatdaşlygyny ösdürmek babatynda dürli ulgamlarda, şol sanda saýlaw ulgamynda hem uly üstünlikler gazanylýar.
Şonuň netijesinde ýurdumyzda saýlawlar milli kanunçylygymyz esasynda we halkara kadalaryna laýyklykda geçirilýär hem-de saýlaw ulgamy barha kämilleşdirilýär.
Hormatly Prezidentimiziň – Arkadagly Gahryman Serdarymyzyň saýlawlary guramak we geçirmek boýunça dünýä tejribelerini öwrenmek, oňyn tejribeleri milli kanunçylygymyza laýyklykda saýlaw ulgamynyň işine ornaşdyrmak baradaky nesihatlaryndan ugur alnyp, daşary ýurt döwletleriniň saýlaw ulgamynyň tejribesini öwrenmek maksady bilen, Türkmenistanda Saýlawlary we sala salşyklary geçirmek boýunça merkezi toparyň wekilleriniň daşary ýurtlara iş saparlary guralýar. Dogrusy, halkara hyzmatdaşlygynyň çäklerinde daşary ýurt döwletlerinde geçirilýän saýlawlara, sala salşyklara, saýlawlar bilen bagly dürli çärelere gatnaşmak, tejribe alyşmak indi asylly däbe öwrüldi.
Halkara hyzmatdaşlygynynyň çäklerinde, Ýewropada Howpsuzlyk we Hyzmatdaşlyk Guramasynyň (ÝHHG) Demokratik institutlar we adam hukuklary baradaky býurosynyň çagyrmagy boýunça, 2025-nji ýylyň 8–10-njy iýuny aralygynda Türkmenistanyň merkezi saýlaw toparynyň başlygynyň orunbasarynyň ýolbaşçylygyndaky wekiliýet bu Býuronyň işi bilen tanyşmak hem-de hyzmatdaşlygyň geljekki mümkinçiliklerini ara alyp maslahatlaşmak maksady bilen, Polşa Respublikasynyň Warşawa şäherinde saparda boldy.
Şeýle-de, 2025-nji ýylyň 2-nji martynda geçirilen Täjigistan Respublikasynyň Oli Mejlisiniň deputatlarynyň saýlawlaryna hem-de 2025-nji ýylyň 30-njy noýabrynda geçirilen Gyrgyz Respublikasynyň Žogorku Keneşiniň deputatlarynyň saýlawlaryna Türkmenistanyň merkezi saýlaw toparynyň we Türkmenistanyň Mejlisiniň wekiliniň GDA agza döwletlerden düzülen halkara synçylar wekiliýetiniň düzüminde halkara synçy bolup gatnaşandyklaryny bellemek bolar.
Hormatly Prezidentimiz abraýly halkara guramalary bilen hyzmatdaşlyk etmegiň döwletimiziň halkara syýasatynyň strategik ugurlarynyň biridigini, mundan beýläk-de şeýle boljakdygyny nygtaýar.
Hormatly Prezidentimiz Türkmenistanyň Prezidenti wezipesine girişmek dabarasynda eden çuň manyly çykyşynda ýurdumyzyň daşary syýasatynyň ileri tutulýan ugurlaryny anyk kesgitledi. Olaryň arasynda döwletimiziň halkara guramalary, ilkinji nobatda bolsa, BMG bilen hyzmatdaşlygynyň ösdürilmegine esasy orun berilýär.
Bu babatda, Türkmenistanyň merkezi saýlaw topary bilen BMGÖM-niň Türkmenistandaky wekilhanasynyň arasynda gol çekilen «Türkmenistanda Saýlawlary we sala salşyklary geçirmek boýunça merkezi toparyň mümkinçiliklerini artdyrmakda ýardam etmek» atly 2024-2025-nji ýyllar üçin Taslama resminamasynyň çäklerinde:
– 2024-nji ýylyň 9–10-njy dekabry aralygynda «Gender deňligini göz öňünde tutup, saýlawçylaryň bitewi sanawyny döretmekde halkara tejribesini öwrenmek» atly iki günlük okuw maslahaty geçirildi;
– 2025-nji ýylyň 18–21-nji fewraly aralygynda «BRIDGE» maksatnamasy esasynda, «Saýlawlaryň dolandyrylyşyna giriş» atly dört günlük okuw maslahaty geçirildi;
– 2025-nji ýylyň 8–9-njy dekabry aralygynda «Zenanlaryň ýurduň syýasy we jemgyýetçilik durmuşyna gatnaşygyny artdyrmak boýunça wagtlaýyn ýörite çäreler» atly iki günlük okuw maslahaty geçirildi;
– saýlawçylaryň bitewi döwlet sanawyny ýöretmek we onuň kiberhowpsuzlygyny üpjün etmek, saýlawçynyň şahsyýetini anyklamak hem-de saýlaw işlerini dolandyrmagyň awtomatlaşdyrylan gurallaryny ulanmak boýunça toplanan tejribäni öwrenmek maksady bilen, Türkmenistanyň merkezi saýlaw toparynyň başlygynyň orunbasarynyň ýolbaşçylygyndaky wekiliýet 2025-nji ýylyň 12–17-nji noýabry aralygynda Ermenistan Respublikasynyň Ýerewan şäherinde saparda boldy;
– Türkmenistanyň merkezi saýlaw toparynyň internet saýtynyň işi halkara derejesinde kämilleşdirildi we edarasynyň elektron kitaphanasy kompýuter we printer enjamlary bilen üpjün edildi.
Şunlukda, bu iki ýyllyk Taslamanyň çäklerinde guramaçylykly amala aşyrylan çäreler netijeli we ähmiýetli boldy.
Geçen 2025-nji ýylyň dowamynda, hyzmatdaşlygyň geljekki mümkinçiliklerini ara alyp maslahatlaşmak maksady bilen, BMGÖM-niň hem-de ÝHHG-niň Demokratik institutlar we adam hukuklary baradaky býurosynyň wekilleri bilen Türkmenistanyň merkezi saýlaw toparynyň edarasynda ikitaraplaýyn duşuşyklar geçirildi.
Elbetde, biziň demokratik, hukuk we dünýewi döwletimizde guramaçylykly geçirilýän saýlawlara hem dünýäniň iri halkara guramalaryndan, dostlukly döwletlerinden halkara synçylar gatnaşyp, saýlawlaryň taýýarlyk işleri, ses bermegiň geçirilişi bilen tanyşýarlar. Abraýly halkara guramalaryndan gelen synçylar toparlarynyň baştutanlary saýlawlardan soňky metbugat maslahatlarynda saýlawlaryň asudalyk, açyklyk we aýanlyk ýagdaýynda hem-de kanunalaýyklykda geçirilip, Türkmenistanyň ösüşiň demokratik ýoluna ygrarlydygyny kanagatlanma bilen aýdýarlar.
Bilşimiz ýaly, 2025-nji ýylyň 28-nji iýunynda «Saýlawçylaryň bitewi döwlet sanawy hakynda» Türkmenistanyň kanunyň kabul edilmegi we 2026-njy ýylyň 1-nji ýanwaryndan herekete girizilmegi demokratik döwletimiziň saýlaw ulgamynyň işiniň halkara derejesinde kämilleşdirilýändiginiň aýdyň subutnamasydyr.
Şeýlelik bilen, «Garaşsyz, baky Bitarap Türkmenistan – bedew batly at-myradyň mekany» diýlip atlandyrylan ýylyň 1-nji ýanwaryndan güýje giren bu Kanun ýurdumyzyň saýlaw ulgamynda täze bir ösüşli gadamlaryň başlanandygyny äşgär edýär.
Ýurdumyzda halkara hyzmatdaşlygyny nusgalyk derejede ösdürip, agzybir halkyny demokratik ýol bilen bagtyýar geljege alyp barýan Gahryman Arkadagymyzyň we Arkadagly Gahryman Serdarymyzyň janlary sag, belent başlary aman bolsun, döwletli tutumlary mundan beýläk-de rowaçlyklara beslensin!
Maksat Saipow,
Türkmenistanda Saýlawlary we sala salşyklary geçirmek boýunça merkezi toparyň edarasynyň Guramaçylyk müdirliginiň baş hünärmeni.
03.04.2026
