TÜRKMENISTANDA SAÝLAWLARY
WE SALA SALŞYKLARY GEÇIRMEK
BOÝUNÇA MERKEZI TOPAR

Mälim bolşy ýaly, Türkmenistanda täze döredilen etraplaryň halk maslahatlarynyň agzalygyna hem-de ygtyýarlyk möhletinden öň çykyp giden Türkmenistanyň Mejlisiniň deputatlarynyň, welaýat, etrap, şäher halk maslahatlarynyň we geňeşleriň agzalarynyň ýerine 2026-njy ýylyň 29-njy martynda geçiriljek saýlawlara taýýarlyk işleriniň çäklerinde, saýlaw çäreleriniň tassyklanylan meýilnamasyna laýyklykda, ýurdumyzyň welaýatlarynda we Aşgabat şäherinde okuw maslahatlary geçirildi.

Merkezi saýlaw toparynyň edarasynyň hünärmenleriniň alyp barmagynda şu ýylyň 28–30-njy ýanwary aralygynda geçirilen okuw maslahatlaryna welaýat, etrap, şäher, okrug we etrapdaky şäher, şäherçe, geňeşlik saýlaw toparlarynyň agzalary, syýasy partiýalaryň welaýat, etrap, şäher guramalarynyň wekilleri, şeýle hem welaýat, etrap, şäher häkimlikleriniň saýlaw işlerine ýardam bermek boýunça jogapkär wekilleri gatnaşdylar.

Okuw maslahatlaryň barşynda ýurdumyzda saýlaw ulgamyny döwrebap derejede kämilleşdirmek boýunça amala aşyrylýan işler, şeýle-de, öňde boljak saýlawlary guramaçylykly geçirmegiň tertibi, has takygy, saýlaw kanunçylygy, saýlawlarda hereket edýän saýlaw toparlarynyň ulgamy, welaýat, etrap, şäher, okrug we etrapdaky şäher, şäherçe, geňeşlik saýlaw toparlarynyň ygtyýarlyklary barada aýdylyp geçildi.

Şeýle-de, okuw maslahatlarynda dalaşgärleri hödürlemek we dalaşgärleri bellige almak möwsümi bilen baglylykda, syýasy partiýalar hem-de raýatlar toparlary tarapyndan Türkmenistanyň Mejlisiniň deputatlygyna, welaýat, etrap, şäher halk maslahatlarynyň we geňeşleriň agzalygyna  dalaşgärleri hödürlemegiň, şeýle hem degişli saýlaw topary tarapyndan olary bellige almagyň tertibi hakynda giňişleýin düşündirildi. Mundan başga-da, saýlaw resminamalaryny doldurmagyň, saýlaw uçastoklarynyň araçäklerini kesgitlemegiň, şeýle hem degişli saýlaw toparlary tarapyndan ses bermegiň netijeleri hakynda teswirnamalary düzmegiň tertibi barada giňişleýin düşünje berildi.

Welaýat, etrap, şäher häkimlikleri tarapyndan saýlaw işlerine ýardam bermek boýunça alnyp barylmaly işler dogrusynda aýratyn nygtalyp geçildi.

Okuw maslahatlarynyň ahyrynda oňa gatnaşyjylar «Garaşsyz, baky Bitarap Türkmenistan — bedew batly  at-myradyň mekany» ýylynyň 29-njy martynda geçiriljek saýlawlaryň demokratik ýörelgeleri çuňlaşdyrmagyň ýolundaky möhüm ädimdigini we ýurdumyzda amala aşyrylýan özgertmeleri üstünlikli durmuşa geçirmekde ygtybarly binýat bolup durýandygyny nygtap, saýlaw möwsüminiň ýokary derejede geçirilmegi ugrunda ähli zerur tagallalaryny gaýgyrmajakdyklaryna ynandyrdylar.

Okuw maslahatlaryna gatnaşyjylar ýurdumyzda saýlawlary demokratik ýörelgelerimize laýyklykda geçirmeklige ähli şertleri, giň mümkinçilikleri döredip berýän hormatly Prezidentimize — Arkadagly Gahryman Serdarymyza tüýs ýürekden alkyş aýdyp, öz hoşallyklaryny bildirdiler.