TÜRKMENISTANDA SAÝLAWLARY
WE SALA SALŞYKLARY GEÇIRMEK
BOÝUNÇA MERKEZI TOPAR

Türkmenistanyň hormatly Prezidentiniň saýlawlary guramak we geçirmek boýunça dünýä tejribelerini öwrenmek baradaky nesihatlaryna we tabşyrygyna laýyklykda, Türkmenistanda Saýlawlary we sala salşyklary geçirmek boýunça merkezi toparyň wekili hem-de Türkmenistanyň Mejlisiniň wekili 2025-nji ýylyň 30-njy noýabrynda geçirilen Gyrgyz Respublikasynyň  Žogorku  Keneşiniň  deputatlarynyň saýlawlaryna Garaşsyz Döwletleriň Arkalaşygyna agza döwletlerden düzülen halkara synçylar wekiliýetiniň düzüminde Türkmenistan döwletinden halkara synçy bolup gatnaşdylar.

Türkmenistandan halkara synçy bolup gatnaşan wekiller Gyrgyz Respublikasynyň saýlaw ulgamynyň işi, saýlawlarda sanly ulgamyň ähmiýeti, saýlawlar hakyndaky kanunçylyk bilen tanyşdylar. Şeýle-de saýlaw uçastoklarynda ses bermegiň geçirilişine syn etdiler.  

Saýlawlar Gyrgyz Respublikasynyň Konstitusiýasy, «Gyrgyz Respublikasynyň Prezidentiniň saýlawlary we Gyrgyz Respublikasynyň  Žogorku Keneşiniň deputatlarynyň saýlawlary hakynda» Konstitusion kanuny we saýlawlara taýýarlyk görlüşini we onuň geçirilişini düzgünleşdirýän beýleki kanunçylyk namalary, şeýle hem Merkezi saýlaw toparynyň kararlary esasynda geçirildi.

Saýlawlara taýýarlyk görmek we geçirmek işlerini Gyrgyz Respublikasynyň Merkezi saýlaw topary, 30 sany okrug we 2 619 sany uçastok (şol sanda uzakdan ses bermek üçin 27-si we daşary ýurtlarda 100 sany) saýlaw toparlary guradylar.

Saýlawlar güni saýlaw uçastoklarynda ses bermek ýerli wagt bilen sagat 08:00-dan 20:00-a çenli geçirildi.

Gyrgyz Respublikasynyň Merkezi saýlaw toparynyň saýlawlaryň jemi baradaky habaryna görä, 4 million 294 müň 243 saýlaw hukukly saýlawçy hasaba alnypdyr. Saýlawlarda 90 mandat üçin dalaşgärleriň 460-sy bäsleşdi.

Gyrgyz Respublikasynyň Žogorku Keneşiniň deputatlarynyň saýlawlaryna syn etmäge gatnaşan Türkmenistan döwletiniň wekilleri 2025-nji ýylyň 30-njy noýabrynda Gyrgyz Respublikasynyň Merkezi saýlaw toparynyň başlygy T.U.Şaýnazarow bilen duşuşdylar. Şeýle-de, şol gün ses bermek tamamlanandan soňra, Garaşsyz Döwletleriň Arkalaşygynyň Baş sekretarynyň orunbasary L.W.Petrişenkonyň GDA gatnaşyjy döwletleriň wekiliýetleriniň ýolbaşçylary bilen geçiren geňeşine-de gatnaşdylar.