2026-06-04
Mälim bolşy ýaly, şu günler ýurdumyzda welaýat, Aşgabat we Arkadag şäher saýlaw toparlarynyň ygtyýarlyk möhletiniň tamamlanýandygy sebäpli, olary täzeden döretmek boýunça işler dowam edýär. Bu saýlaw toparlaryny täzeden döretmek işleri, Türkmenistanyň Saýlaw kodeksine laýyklykda, tassyklanylan meýilnama esasynda, guramaçylykly amala aşyrylýar.
Welaýat, Aşgabat we Arkadag şäher saýlaw toparlary Merkezi saýlaw topary tarapyndan 9–13 agzadan ybarat düzümde döredilýär. Ýeri gelende aýtsak, ýurdumyzda saýlawlar bilen bagly çäreleriň syýasy köpdürlülik, ýagny köppartiýalylyk ýörelgeleri esasynda geçirilýändigi bellärliklidir.
Türkmenistanyň Saýlaw kodeksiniň 18-nji maddasyna laýyklykda, welaýat, Aşgabat we Arkadag şäher saýlaw toparlarynyň düzümine wekiller syýasy partiýalaryň, jemgyýetçilik birleşikleriniň welaýat, etrap, şäher guramalarynyň mejlislerinde, raýatlaryň toparlarynyň ýygnaklarynda hödürlenilýär.
Welaýat, Aşgabat we Arkadag şäher saýlaw toparlarynyň düzümine wekil hödürlemek boýunça raýatlaryň ýygnagyna degişli etrabyň, şäheriň çäginde ýaşaýan saýlawçylaryň azyndan ýüzüsi gatnaşsa, ol ygtyýarly hasap edilýär. Ýygnaga gatnaşýanlar bellige alynmaga degişlidir, bellige alyş sanawynda her bir saýlawçynyň familiýasy, ady, atasynyň ady, doglan senesi, ýaşaýan ýeri görkezilýär.
Mejlislerde we ýygnaklarda saýlaw toparlarynyň düzümine hödürlenýänleriň çäklendirilmedik sany ara alnyp maslahatlaşylyp bilner. Saýlaw toparynyň düzümine wekil hödürlenilýän mejlise, ýygnaga gatnaşýan her bir adamyň hödürlenilýänler hakynda teklip girizmäge, olaryň ara alnyp maslahatlaşylmagyna gatnaşmaga, olary oňlamaga ýa-da ret etmäge, saýlaw toparynyň düzümine hut özüni hem ara alnyp maslahatlaşmak üçin hödürlemäge haky bardyr.
Eger-de, syýasy partiýanyň, jemgyýetçilik birleşiginiň degişli guramasynyň mejlisine, raýatlar toparlarynyň ýygnagyna gatnaşyjylaryň ýarysyndan köpüsi saýlaw toparynyň düzümine hödürlenilýäniň tarapyna ses berse, onda ol hödürlenilen diýlip hasap edilýär.
Şeýlelikde, häzirki wagtda Merkezi saýlaw topary tarapyndan welaýat, Aşgabat we Arkadag şäher saýlaw toparlaryny täzeden döretmek we syýasy partiýalar, jemgyýetçilik birleşikleri we raýatlaryň toparlary tarapyndan saýlaw toparlarynyň düzümine wekil hödürlemek işleri guramaçylykly dowam edýär.
