TÜRKMENISTANDA SAÝLAWLARY
WE SALA SALŞYKLARY GEÇIRMEK
BOÝUNÇA MERKEZI TOPAR

Ýurdumyz bu gün demokratik ýörelgeleri çuňlaşdyrmak ýoly bilen öňe ynamly gadam urýar. Demokratik şertleriň çäklerinde ýurdumyzda her bir türkmen raýatynyň saýlaw hukuklarynyň üpjün edilmegine hem uly üns berilýär. Saýlawlaryň guramaçylykly geçirilmeginde, raýatlaryň saýlaw hukuklarynyň kepillikleriniň kanunalaýyk üpjün edilmeginde ýurdumyzda hereket edýän saýlaw toparlarynyň möhüm orny bardyr.

Welaýat, Aşgabat şäher saýlaw toparlarynyň bäş ýyllyk ygtyýarlyk möhletiniň tamamlanandygy sebäpli, toparlar täzeden döredildi. Welaýat, Aşgabat şäher saýlaw toparlaryny täzeden döretmek işleri Türkmenistanyň Saýlaw kodeksine laýyklykda, Merkezi saýlaw topary tarapyndan tassyklanylan meýilnama esasynda guramaçylykly amala aşyryldy.

Türkmenistanyň Saýlaw kodeksiniň 18-nji maddasyna laýyklykda, welaýat, Aşgabat şäher saýlaw toparlarynyň düzümine wekilleri hödürlemek işleri syýasy partiýalaryň, jemgyýetçilik birleşikleriniň welaýat, Aşgabat şäher guramalarynyň mejlislerinde, şeýle hem raýatlar toparlarynyň ýygnaklarynda geçirildi.  

Has takygy:

Türkmenistanyň Demokratik partiýasyndan 20;

Türkmenistanyň Senagatçylar we telekeçiler partiýasyndan 4; 

Türkmenistanyň Agrar partiýasyndan 6;

Türkmenistanyň Kärdeşler arkalaşyklaryndan 15;

Türkmenistanyň Magtymguly adyndaky Ýaşlar guramasyndan 8;

Türkmenistanyň Zenanlar birleşiginden 5;

Raýatlaryň toparlaryndan 8 wekil hödürlenildi

Şeýlelikde, ýurdumyz boýunça welaýat, Aşgabat şäher saýlaw toparlarynyň düzümine wekil hödürlemek hakyndaky mejlisleriň, ýygnaklaryň jemi 66-sy  geçirilip, bu çäreler aýanlyk, açyklyk ýagdaýynda we demokratik esaslarda amala aşyryldy.

Syýasy partiýalaryň, jemgyýetçilik birleşikleriniň wekil hödürlemek hakynda geçiren mejlisleriniň, ýygnaklarynyň teswirnamalaryna laýyklykda, welaýat, Aşgabat şäher saýlaw toparlary özleriniň birinji mejlislerini geçirip, onda toparyň başlygyny, başlygynyň orunbasaryny we kätibini saýladylar. Türkmenistanyň Saýlaw kodeksiniň 32-nji maddasyna laýyklykda, Welaýat, Aşgabat şäher saýlaw toparlary Merkezi saýlaw saýlaw topary tarapyndan 11 agzadan ybarat düzümde döredildi.

Şeýlelikde, welaýatlaryň we Aşgabat  şäheriniň saýlaw toparlarynyň agzalarynyň jemi sany 66-a deň boldy we olara degişli şahsyýetnamalar dabaraly ýagdaýda gowşuryldy.

Şol sanda:

Ahal welaýatynyň saýlaw topary – 11 agza;

Balkan welaýatynyň saýlaw topary – 11 agza;  

Daşoguz welaýatynyň saýlaw topary – 11 agza;

Lebap welaýatynyň saýlaw topary – 11 agza;    

Mary welaýatynyň saýlaw topary – 11 agza; 

Aşgabat şäheriniň saýlaw topary – 11 agza.

Şeýle-de, welaýatlaryň we Aşgabat  şäheriniň saýlaw toparlarynyň düzümine ser salanymyzda, milli ykdysadyýetimiziň dürli pudaklarynda zähmet çekýän adamlaryň saýlanylandygyny we şol agzalaryň  19,70 % zenanlardygyny, 100 % ýokary bilimli agzalaryň 66,67 % göteriminiň 30-dan 50 ýaşa çenli adamlardygyny görmek bolýar.  Munuň özi welaýat, Aşgabat şäher saýlaw toparlarynyň täze düzüminiň öz ygtyýarlyk möhletiniň çäklerinde geljek bäş ýylyň dowamynda ýurdumyzda demokratik esaslarda geçiriljek dürli görnüşli saýlawlara işjeň gatnaşjakdyklaryny aňladýar.

Eziz Diýarymyzyň demokratik ýol bilen gülläp ösmegi üçin giň mümkinçilikleri döredip berýän hormatly Prezidentimiziň jany sag, ömri uzak, belent başy aman bolsun! Umumadamzat, il-ýurt bähbitli tutumly işleri, demokratik başlangyçlary hemişe rowaç bolsun!